تاند (شنبه د دلوې ۲۵) د کندهار سیمه ییز چارواکي وايي چې ددغه ولایت په ارغنداب ولسوالۍ کې موټربم چاودنې ۷ پولیس ټپیان کړي.
د کندهار د امنیه قوماندانۍ ویاند جمال ناصر بارکزی وايي، چاودنه نن سهار شاوخوا ۷ بجې او ۳۰ دقیقې د ارغنداب ولسوالۍ په کوهک سیمه کې د هاموې ټانک په وسیله رامنځته شوې چې ۷ پولیس یې ټپیان کړي دي.
خو د کورنیو چارو وزارت ویاند طارق آرین بیا پر خپل ټوېټر لیکلي، د کندهار د ارغنداب ولسوالۍ د کوهک ښوونځي په اړوند سیمه کې نن سهار له چاودیدونکیو توکو ډک موټر د پولیسو لخوا له پېژندنې وروسته په نښه او له منځه وړل شوی دی.
د نوموړي په خبره په دې پېښه کې ۱۲ پولیس ټپیان شوي دي.
تر اوسه د دغه برید مسؤلیت چا نه دی اخیستی.