تاند (شنبه د دلوې ۲۵) په ننګرهار او کونړ ولایتونو کې د سړک غاړې ماین چاودنو د سرتېرو په ګډون ۷ تنو ته مرګ ژوبله اړولې.
د ننګرهار د امنیه قومندانۍ ویاند فرید خان وايي، نن سهار شاوخوا ۹ بجې د جلال اباد ښار دویمې ناحیې اړوند زیتونو فابریکې سیمه کې د زندان په یوه رینجر موټر د سړک غاړې ماین چاودنه کړې چې له امله یې درې ملکیان ټپیان شوي دي.
د یو بل خبر له مخې، د کونړ په چپې درې ولسوالۍ کې تېره شپه شاوخوا دوه بجې د سیمه ییزو پولیسو د ګزمې په موټر د سړک غاړې ماین چاودنه کړې.
د کونړ د امنیه قوماندانۍ ویاند فرید دهقان وايي، په دغه چاودنه کې د محلي پولیسو د یوه ټولي قوماندان فیروز او د هغه یو بل سرتېری وژل شوي او دوه نور ټپیان دي.
تر اوسه د دغه چاودنو مسؤلیت چا نه دی منلی.