تاند ( پنج شنبه، د دلوې ۲۳) د ننګرهار ولایت په مرکز جلال اباد ښار کې د ملي امنیت د ځانګړو ځواکونو ( ۰۲ قطعې) پر کاروان د سړک غاړې ماین چاودنه کړې.
د دې ولایت د رسنیو دفتر وایي چې د چاودنې له امله د دې قطعې یو رېنجر موټر اور اخیستی دی.
سرچینه وایي په چاودنه کې څوک وژل شوي نه دي خو زیاتوي یو شمېر کسان ټپیان شوي دي.
د سرچینې په خبره د ټپيانو حالت ښه دی.
بل لورته عيني شاهدان وايي، نن مازدیګر د ننګرهار هوایي ډګر ته څېرمه د ملي امنیت ځانګړو ځواکونو پر یو رینجر موټر چاودنه شوې او ورسره ډزې هم پیل شوې دي.
د دې چاودنې مسوولیت تر اوسه چا نه دی منلی.
د یادونې ده چې نن سهار د ننګرهار کامې په ولسوالۍ کې هم ماین چاودنې یو ملکي وګړی وژلی وو.
دا چاودنه بیا د یادې ولسوالۍ په دارګلۍ کلي کې د الماس په نوم د یو کس پر شخصي موټرد نښلېدونکي ماین له امله شوې.
امنیتي سرچینې وایي په دې چاودنه کې الماس وژل شوی او یو بل تن ټپي شوی.