د پاکستان ډیلي ټایمز ورځپاڼې خبر ورکړی، د افغانستان امنیتي ځواکونو کابل ښار ته نږدې د ډاکټر تتسو ناکامورا د وژنې اصلي طراح او د پاکستاني طالبانو(ټي ټي پي) مشر امیر نواز چې په حاجي دبي هم مشهور و، وژلی دی.
د ډیلي ټایمز ورځپاڼې په راپور کې ویل شوي، د پاکستاني طالبانو یاد مشر په کراچۍ، پنجاب، بلوجستان او خیبر پښتونخوا کې د وژنو په تور د پاکستان امنیتي ځواکونوو تر تعقیب لاندې و.
سرچېنې لیکلي، د پاکستاني طالبانو قومندان “امیر نواز” پلازمینې کابل ته نژدې سیمه کې د عملیاتو پر مهال وژل شوی دی.
د سرچېنې د معلوماتو له مخې، نوموړی په ۲۰۱۲ کال کې د پاکستان بانو زندان څخه د ټي ټي پي د یو برید په پایله کې تښتېدلی و او له هغه وروسته یې په پاکستان او افغانستان کې هدفي وژنې او بریدونه ترسره کول.
دا په داسې حال کې ده چې جاپاني الاصله افغانی تتسو ناکامورا، چې د افغانستان ابادۍ او پرمختګ لپاره یې کار کاوه په ۲۰۱۹ کال کې د ننګرهار ولایت جلال اباد ښار کې ووژل شو، چې تر اوسه یې د وژنې مسوولیت کومې ډلې پر غاړه نه دی اخيستی.