تاند (چهارشنبه د قوس ۱۲) د لوګر په محمد اغې ولسوالۍ کې د کرکټ یو معياري لوبغالی جوړېږي.
د لوګر ځايي چارواکي وايي، دغه لوبغالی د محمداغې ولسوالۍ ادارې ته په ۳۰ جریبه ځمکه کې د ۶۸ میلیونه افغانیو په مالي لګښت د یو نیم کال په موده کې جوړ او ګټې اخیستنې ته سپارل کېږي.
د لوګر ولایت مطبوعاتي دفتر وايي چې ددغه لوبغالي ۱۲ سلنه کارونه مخته تللي دي.
د یاد لوبغالي په ودانۍ کې جومات د کرکټ اکاډمۍ، احاطوي دېوال، له ۴ تر ۵ زره نندارچیانو لپاره ځای شامل دي.
د محمداغې ولسوال عصمت الله ستانکزی وايي، له دغه لوبغالي به د لوګر سربېره د پلازمېنې کابل او یو شمېر نورو ولایتونو د کرکټ لوبغاړي هم ګټه واخلي.
په لوګر کې د کرکټ مینه وال خوښ دي چې کال وروسته به د لوبو لپاره یو معیاري لوبغالی ولري.
دوی وايي، د دغه لوبغالي له بشپړېدو سره به هغه ځوانان چې د لوبغالي له نشتوالي یې د کرکټ لوبې پرېښې وې دوام ورکړي.
د یاد لوبغالي لګښت د مالیې وزارت د پرمختایي بودیجې له لوري ورکول کیږي او چارې یې د ښارجوړونې وزارت لخوا پر مخ وړل کېږي.
