تاند (پنجشنبه د دلوې ۲۳) د افغانستان د ملي دفاع وزارت په بلخ او کندهار ولایتونو کې د ۸۳ وسله والو طالبانو د وژل کېدو خبر ورکوي.
د دفاع وزارت په یوه خبرپاڼه کې راغلي، افغان ځواکونو تېره ورځ د چهار بولک ولسوالۍ په اق تیپې او ګورتېپې په کلیو کې پر طالبانو هوايي بریدونه وکړل چې په نتیجه کې یې ۵۶ طالبان ووژل شول.
د خبرپاڼې د معلوماتو له مخې په وژل شویو کسانو کې د طالبانو لوړ پوړي قوماندانان هم شامل دي.
سرچینه زیاتوي، ددغو بریدونو له کبله د طالبانو دوه مرکزونه ویجاړ شوي او د مهماتو یوه ډیپو یې هم له منځه تللې ده.
دغه راز د دفاع وزارت وايي، د افغان ځواکونو په هوايي بریدونو کې د هلمند ولایت په ناوې، نهرالسراج او ګرمسېر ولسوالیو کې ۲۷ طالبان وژل شوي او درې نور ټپیان دي.
ددغه وزارت په خبرپاڼه کې راغلي، په وژل شویو کسانو کې د طالبانو دوه مهم او مسلکي نښان ویشتونکي قوماندانان هم شامل دي.
دفاع وزارت وايي په دې بریدونو کې د طالبانو یو موټر، دوه پټنځایونه او یوه اندازه وسلې او مهمات هم له منځه وړل شوي.
طالبانو تر اوسه په دې هکله خپل نظر نه دی څرګند کړی.