تاند (یکشنبه، د دلوې ۱۹) د امریکا متحده ایالاتو د پخواني ولسمشر بارک اوباما او د هغه د مېرمنې میشل اوباما پروډکشن کمپني (هائر ګرايونډ پروډکشنز) د پاکستاني الاصله برتانیايي ناول لیکونکي محسن حامد په ناول باندې فلم جوړوي.
د راپورونو په حواله، د امریکا د پخواني ولسمشر بارک اوباما او د هغه د مېرمنې فلمي پروډکشن به د نېټ فلېکس نړیوالې شبکې لپاره فلمونه، وېب سیریزونه او فرمايشي فلمونه جوړ کړي.
د اوباما او د هغه د مېرمنې فلمي پروډکشن تر دې مخکې هم د نېټ فلېکس لپاره فلمونه جوړ کړي دي او د دې پروډکشن له لوري جوړې شوې یوې ډاکومینټري یا مستند فلم تېر کال د آسکار جایزه هم ګټلې وه.
د بارک اوباما دغه فلمي پروډکش په ۲۰۲۰ کال کې، په امریکا کې د موټرو د یوه چینايي شرکت په اړه وه، چې د آسکار جایزه یې هم وګټله، اوس دغه پروډکشن د محسن حامد په ناول باندې پر فلم جوړولو سربېره، نېټ فلېکس ته پر وېب سیریزونو باندې هم کار کوي.
د (هائر ګرايونډ پروډکشنز) چې دا ځل کومه ستره پروژه په مخ کې لري، هغه د پاکستاني الاصله برتانوي ناول لیکونکي محسن حامد په ناول (ایګزېټ وېسټ)، چې په ۲۰۱۷ کال کې چاپ شوی دی، د فلم جوړول دي، خو تراوسه دا نه دي ویل شوي، چې یاد فلم به کله بشپړ او خپور شي.
د محسن حامد یاد ناول په لویدیځو هېوادونو کې د پناه اخیستونکو کډوالو په اړه لیکل شوی دی، له همدې امله دا کتاب د نړۍ ګڼو سترو شخصیتونو او نوموتو کسانو خوښ کړی دی.
د امریکا پخواني ولسمشر بارک اوباما هم د محسن حامد ناول (ایګزېټ وېسټ) ډير خوښ کړی دی او اوس چې د اوباما پروډکشن په یاد ناول باندې فلم جوړوي، هم دا ښيي چې د یاد ناول مطالعې په بارک اوباما باندې ډېره اغېزه کړې ده.