تاند (پنجشنبه د دلوې ۱۶) د تخار ځايي چارواکي وايي چې وسله والو طالبانو ددغه ولایت په مرکز تالقان ښار کې یو جهادي قوماندان له خپل زوی سره یو ځای وژلي دي.
د تخار د امنیه قومندانۍ ویاند خلیل اسیر وايي چې دغه پېښه تېره شپه د تالقان ښار اړوند جلنګ ایاق سیمه کې رامنځته شوې ده.
د نوموړي په وینا، وژل شوی جهادي قوماندان طلو نومېږي چې طالبانو یې په کور حمله کړې ده او له خپل زوی سره یې یو ځای وژلی دی.
د خلیل اسیر په خبره، په دې برید کې ددغه جهادي قوماندان یو ساتونکی ټپي شوی دی.
د تخار د امینه قومندانۍ ویاند زیاته کړه چې وژل شوي کس له امنیتي ځواکونو سره نژدې اړیکې لرلې، خو طالبانو تر اوسه په دې هکله څه نه دي ویلي.
تخار د افغانستان په شمال کې یو له ناامنو ولایتونو څخه دی چې په زیاتو برخو کې یې وسله وال طالبان پراخ حضور او فعالیتونه لري.