تاند ( پنجشنبه، د دلوې ۱۶) د افغانستان د ملکي هوايي چلند اداره وايي، د لوی احمد شاه بابا نړیوال هوايي ډګر به په عصري او معیاري توګه ورغول شي.
دغې ادارې د خبرپاڼې په خپرولو سره ویلي، د احمد شاه بابا نړیوال هوايي ډګر د نړیوال ترمینل او د کارګو ترمینل چارې د «USAID» په مالي مرسته او «Tetra Tech» موسسې په تخنیکي همکارۍ یې مطالعات پیل شوي او د اوو میاشتو په موده کې به یې چارې بشپړې شي.
خبرپاڼه وايي، د دغه بهیر له پوره کېدو سره سم به یې د ډېزاین چارې پیل او ترڅنګ به یې د جوړولو چارې هم پیل شي.
خبرپاڼه کې د ملکي هوايي چلند ادارې د مشر محمد قاسم وفايي زاده له قوله ویل شوي، له کندهار څخه دوبۍ او ډهلي ته د اریانا افغان او نورو هوایي شرکتونو د پروازونو د بیا پیلېدو په اړه هم خبرې روانې دي.
دا په داسې حال کې ده چې له تېرو څو کلونو راهیسې په کندهار کې د احمد شاه بابا د هوايي ډګر د جوړولو چارې روانې دي، خو تراوسه یې چارې بشپړې شوي نه دي.