تاند ( دوشنبه، د دلوې ۱۳) د میانمار پوځ د دغه هیواد ولسمشر او د حاکم ډیموکرات ګوند مشرې “آنگ سان سو چي” په ګډون یو شمېر نور غړي نیولي دي.
بهرني رسنۍ وایي چې پوځ د یادو کسانو تر نیول کېدو ورسته په دغه هیواد کې د یو کال لپاره پوځي حکومت اعلان کړی.
د میانمار پوځ اعلان کړی دی چې دمګړی واک او حکومت د دوی په کنټرول کې دی او په ټول هېواد کې یې د یوه کال لپاره اضطراري وضعیت اعلان کړی دی.
د دې کودتا وېره وروسته له هغه راپورته شوه کله چې د یاد هېواد د ملکي حکومت او اردو تر منځ د څو ورځو شخړو وروسته ټول ټاکنې ترسره شوې.
د میانمار پوځيان د ښار په ټولو ساحو کې ګرځنده ګزمې لري او مخابراتي شبکې یې هم ګډې وډې کړې دي.
بل لورته متحده ایالات هم غبرګون ښودلی او ویلي یې دي چې د وروستي ټاکنو د پایلو د بدلېدو یا د میانمار د ډیموکراتیک لیږد د مخنیوي لپاره د هرې هڅې سره مخالفت کوي او د مسؤلینو پرضد به اقدام وکړي.
آسټرالیا بیاهم د میانمار د پورځ پر وروستي اقدام اندېښنه ښودلې.
آسټرالیایي چارواکو د غیرقانوني توقیف شویو مشرانو د ژر تر ژره خوشې کیدو غوښتنه هم کړې ده.