تاند (شنبه، د دلوې ۱۱) د ټي ټېن سوداګریز لیګ چې د جنوري په ۲۸مه د اتو لوبډلو ترمنځ د متحده اماراتو ابوظبۍ شیخ زاید لوبغالي کې پيل شوه په کې شاوخوا ۱۶ افغان لوبغاړي له بېلابېلو لوبډلو سره لوبېږي.
د روان لیګ په دوهمه ورځ درې لوبې ترسره شوې چې په ټولو لوبډلو کې افغان لوبغاړو شتون درلود.
لومړۍ لوبه:
لومړۍ لوبه چې جمعه مازدیګر ترسره شوه د پوني ډیویلس لوبډلې لپاره ځوان لوبغاړی درویش رسولي ولوبید او په ون ډاون مقام کې يې په ۲۴ توپونو ۳۹ منډې جوړې کړې.
رسولي ښه وځلېد خو د قلندر لوبډلې لپاره بیا عظمت عمرزي یواځې یو اور ترسره کړ او ۱۷ منډې يې ورکړې او په وېکېټ اخېستلو بریالی نه شو.
دوهمه لوبه:
دوهمه لوبه کې د ماراټا لوبډلې لپاره جاوید احمدي د یو ورځنیو لوبو په څېر توپ وهنه ترسره کړه چې په ۱۹ توپونو يې ۲۴ منډې جوړې کړې خود همدې لوبډلې لپاره بل افغان لوبغاړی یمین احمدزي بیا د رحمان الله ګربز وېکېټ ترلاسه کړه.
رحمن الله ګربز د تېرې سیالۍ په خلاف نن ښه ونه ځلېده او په څلورو منډو يې خپله وېکېټ یمین ته پرېښوده.
که څه هم محمد نبي ته د توپ اچونې او توپ وهنې موقع په لاس ورنغله خو د لوبې پرمهال يې دوه کېچونه ترلاسه کړل.
دريمه لوبه:
په درېيمه لوبه کې د ابوظبۍ لپاره دوه افغان لوبغاړي ولوبیدل نجیب الله ځدراڼ په ۳ توپونو ۴ او نوین الحق بیا په ۴ توپونو ۴ منډې جوړې کړې خو په توپ اچونه کې يې په دوه اورونو کې ۱۷ منډې ورکړې او وېکېټ يې ترلاسه نشوه کړای.
بل لور ته بیا د ډکن لپاره په توپ وهنه کې محمد شهزاد په ۱۴توپونو د درې څلوریزو او یوې شپږیزې پر مټ ۲۱ منډې جوړې کړې.
نن هم په دغه لیګ کې درې سیالۍ ترسره کیږي او ګڼ افغانان به پکې ولوبیږي.