تاند (جمعه، د دلوې ۱۰) د صنعت او سوداګرۍ وزارت مسوولین وايي، په ۲۰۲۰ کال کې له افغانستان څخه چین ته د ۵۴ میلیونه ډالرو په ارزښت صادرات شوي چې دا د ۲۰۱۹ کال په پرتله ۸۶ سلنه زیاتوالی ښیي.
د دغه وزارت له لوري په خپره شوې خبر پاڼه کې ویل شوي چې په ۲۰۱۹ کال کې چین ته د افغانستان صادرات ۲۹ میلیونه ډالر و، خو په تېر ۲۰۲۰ کال کې دا کچه ۵۴ میلیونه ډالرو ته رسېدلې ده.
د سرچېنې د مالوماتو له مخې ، چین ته په صادر شویو توکو کې جلغوزې، مالوچ، وچه مېوه، قیمتي کاڼي او یو شمېر نور توکي شامل دي.
دا په داسې حال کې ده چې دې وروستیو کې د چین سربېره؛ له افغانستانه هند تاجکستان او ځینې نورو هېوادونو ته هم قیمتي کاڼي وچه او تازه مېوه او داسې نور توکي صادر شوي چې دې هڅې د افغان سوداګرو هېلې راټوکولي دي.