تاند (جمعه، د دلوې ۱۰) طالبانو د امریکا هغې ادعا ته غبرګون ښکاره کړ چې ویلي یې دي، طالبان د تاوتريخوالي کمولو او القاعدې سره د اړيکو پرېکولو په ګډون له امریکا سره د سولې تړون کې پر خپلو ژمنو نه دې درېدلي.
خو طالبانو دا امریکا دا ادعا رد کړې او وایي، دوی د دوحې هوکړې ته په بشپړ ډول ژمن دي. د یادې ډلې ویاند ذبیح الله مجاهد وایي، دوی د دوحې تړون ته بشپړه ژمنتیا لري او د تړون ټولې مادې یې عملي کړي دي.
هغه پر خپله ټویټر پاڼه لیکلي، چې د دوحې تړون عملي کول د روانې لانجې یوازنۍ حل دی او له امریکایي لوري یې غوښتي چې دوی هم دغه تړون مراعت کړي.
دا په داسې حال کې ده چې تېره ورځ د امریکا د دفاع وزارت ویاند جان کربي وویل چې طالبانو د تاوتريخوالي کمولو او له القاعدې سره د اړيکو پرې کولو په ګډون د دوحې تړون کې پاتې راغلي او خپلې ژمنې یې ماتې کړي دي.
په ورته وخت کې ولسمشرۍ ماڼۍ وایي چې د امریکا د بهرنیو چارو وزیر انتوني بلېنکن بیګا شپه ولسمشر غني سره ټیلیفوني خبرې کړي او ویلي یې دي، زموږ ګډ هدف خپلواک، متحد او ډيموکراتيک افغانستان دی، د پایداره سولې او دايمي اوربند ټینګښت لپاره به په سيمه کې خپلو ډيپلوماتيکو هڅو ته دوام ورکړي.
د ارګ خبرپاڼه کې ویل شوي چې نوموړي د بشري حقونو، ښځو حقونو او نورو ارزښتونو پر ساتنې او پياوړتیا د ټينګار تر څنګ د دواړو هېوادونو تر منځ د اړیکو او همکاریو خبره کړې، ویلي یې دي چې ډېر ژر به د امریکا نوی ولسمشر جوبايډن ولسمشر غني سره ټیلفوني خبرې وکړي.