تاند (پنج شنبه، د دلوې ۹) د افغانستان او زمبابوې کرکټ لوبډلو ترمنځ د کرکټ لوبې راتلونکې فبرورۍ میاشت کې پیلېږي.
تازه د زمبابوې د سپورټ فدراسیون د دغه هېواد کرکټ بورډ ته اجازه ورکړه چې، له افغانستان سره د لوبو لپاره اماراتو، پاکستان او یا هم هند ته لاړ شي.
د افغانستان کرکټ بورډ وايي، له زمبابوې سره را روانې لوبې د افغانستان په کوربتوب پیلېږي.
افغان کرکت بورډ وایي چې،په دې لوبو کې ۳ شل اوره ۳ یو ورځنۍ او ۲ ټېسټ یا پنځه ورځنۍ لوبې شاملې دي.
زمبابوې داسې مهال نورو هېوادونو ته د سفر اجازه ترلاسه کوي چې لا هم په دې هېواد کې د کورونا له امله ټول ښارونه تړلي دي.
د یادونې ده چې افغانستان له دې وړاندې له ایرلینډ کرکټ لوبډلې درې یو ورځنۍ لوبې وګتلې او د سوپر سېکس سیالیو په جدول کې یې ۳۰ نومرې ترلاسه کړې.
د سرچینې په حواله له زمبابوې سره سیالۍ هم د سوپر سېکس سیالیو برخه ده چې ګټل یې د افغانستان لپاره خورا مهم دي.
د سوپر سېکس سیالیو په لړکې افغانستان د نړۍ له بېلابېلو پیاوړو لوبډلو سره ۲۴ لوبې لري چې ۲۰۲۳ نړیوال جام ته د تګ لپاره یې لږ تر لږه د ۱۴ ګټل ورته اړین دي.