تاند (پنجشنبه د دلوې ۹) ځايي سرچینې وايي، د ننګرهار والي ضیاءالحق امرخېل هسکې مېنې ولسوالۍ ته په سفر تللی و چې د موټرو پر کاروان یې وسله وال برید وشو.
د سرچینې د معلوماتو له مخې، والي غوښتل چې نوموړې ولسوالۍ ته د خپل سفر په ترڅ کې د جودرې د نوي جوړ شوي جومات لیدنه او پرانیسته وکړي چې د تګ پرمهال پرې برید وشو او دوه تنه افغان سرتیرې پکې ټپیان شول.
تر اوسه رسمي سرچینو د دې پېښې پخلی نه دی کړی.
د هسکې مېنې د جودرې جومات نژدې یو نیم کال وړاندې د داعش په هغه برید کې ونړېد چې د جمعې د لمانځه پر مهال یې شاوخوا ۸۰ لمونځ کوونکي ووژل.
د یو بل خبر له مخې په دې ولایت کې د دوو بېلو امنیتي پېښو له امله څلورو کسانو ته مرګ ژوبله اوښتې ده.
د راپورونو له مخې نن سهار ناپېژانده وسله والو د جلال اباد ښار په فارم هډې سیمه کې دوه وروڼه چې یو یې د ملي امنیت او بل یې د مستوفیت کارکوونکی و په ډزو وژلي دي او بریدګر له سیمې په تېښته بریالي شوي دي.
دغه راز ددې ولایت په غني خېلو ولسوالۍ کې نن سهار شاوخوا ۹ بجې په یوه کرولا موټر چسپکي ماین چاودنه کړې چې له امله یې یو کس وژل شوی او یو بل ټپي دی.
تر اوسه د یادو پېښو مسؤلیت کومې ډلې نه دی منلی.