تاند (پنجشنبه د دلوې ۹) د ملي دفاع وزارت وايي، دفاعي او امنیتي ځواکونو د کندهار ولایت په درېیوو ولسوالۍ کې چاڼیز عملیات کړي چې پر مهال یې ۶۸ وسله والو طالبانو ته مرګ ژوبله اوښتې ده.
د دفاع وزارت نن پنجشنبه د یوې خبرپاڼې په خپرولو سره ویلي چې دغه عملیات د ارغنداب ولسوالۍ بابران، د پنجوايي ولسوالۍ خیبر غر او د ډنډ ولسوالۍ په یارو قلعه سیمو کې تر سره شوي دي.
د سرچینې د معلوماتو له مخې، په دې عملیاتو کې ۵۲ طالبان ووژل شوي او ۱۶ نور ټپيان دي.
دفاع وزارت وايي په دې نښتو کې د وسله والو طالبانو ۳ مورچلې، یو شمېر وسایط او وسلې او مهمات هم له منځه وړل شوي دي.
د ملي دفاع وزارت زیاتوي، طالبانو د کندهار ولایت د ژېړۍ ولسوالۍ په بېلا بېلو سیمو کې د امنیتي ځواکونو او ملکي خلکو د تګ راتګ په لارو کې ۱۹ د وسایطو ضد ماینونه ځای پرځای کړي و چې د امنیتي ځواکونو له لوري کشف او شنډ شول.
طالبانو تر اوسه په دې هکله کوم څه نه دي ویلي.