تاند (چهارشنبه د دلوې ۸) د ملي روغې جوړې عالي شورا مشر عبدالله عبدالله وايي، قطر کې د حکومت مرکچي پلاوی به د مقابل لوري پر وړاندې د سولې مذاکراتو کې د مېرمنو حقونو څخه دفاع وکړي او په خبره یې چې د ښځو د حقونو مسئله د افغانستان حکومت ته ارزښت لري او هېڅ ډول معامله به پرې ونه شي.
ښاغلي عبدالله دغه څرګندونې نن چهارشنبه په کابل کې د اوربند په تړاو د مېرمنو د غوښتنو او نظرونو ملي کنفرانس کې وکړې.
نوموړي وویل، ایران ته د طالبانو د مرکچي پلاوي سفر د افغان حکومت او ملي روغې جوړې عالي شورا سره په هوکړه شوی دی.
هغه وویل، د سولې په خبرو کې تر ټولو مهمه مسئله په افغانستان کې د سراسري اوربند ټینګېدل دي چې هېڅکله به له پامه ونه غورځول شي.
د عبدالله په خبره، ددې لپاره چې خلک د سولې په پروسه باور پیداکړي او یوې تل پاتې سولې ته زمینه برابره شي لومړی باید اوربند وشي.
عبدالله عبدالله وویل، په افغانستان کې د تروریستي ډلو عملیاتو د بهرنیو ځواکونو پاتې کېدو ته زمینه برابره کړې، خو په وینا په هغه صورت کې چې ترهګریزې ډلې دلته خپل فعالیتونه ودروي د افغانانو په غوښتنه به بهرني ځواکونه له افغانستان څخه ووځي.
د نوموړي په وینا، ټاکل شوې راتلونکې اوونۍ د ناټو د غړیو هېوادونو د دفاع وزیرانو غونډه جوړه شي او د افغانستان په اړه په کې خبرې وشي.
د ملي روغې جوړې عالي شورا رئیس د افغانانو اساسي غوښتنو ته په اشارې وویل، جګړه د حللار نه ده او د مذاکراتو پایلې باید مثبتې وي.
دا په داسې حال کې ده چې په دوحه کې د حکومت مرکچي پلاوي ویاند نادر نادري تېره ورځ ویلي چې له تېرو ۹ ورځو راهیسې د دواړو خواوو ترمنځ ناستې نه دي شوي او لامل یې هم د طالبانو نه ګډون په ګوته کړی دی.
خو طالبانو تر اوسه د نادر نادري ددې خبرو په اړه څه نه دي ویلي.
بله خوا بیا د چارو ځینې شنونکي وايي چې غونډو کې د طالبانو د نه ګډون لامل دا دی، ترڅو د امریکا نوی ولسمشر جو بایډن د افغان سولې په اړه خپل دریځ څرګند کړي.