تاند (چهارشنبه د دلوې ۸) د هرات سیمه ییز مسؤلان وايي، د هرات –کندهار په لويه لاره د یوې ترافیکي پېښې له امله ۹ کسان مړه شوي او ۲ نور ټپيان دي.
د هرات د ادرسکن ولسوال عبدالعلي فقیریار وايي چې دغه پېښه نن مازدیګر شاوخوا څلور بجې د ادرسکن ولسوالۍ په زیارت سیمه کې د یوه ۴۰۴ ډوله مسافر وړونکي او سراچه موټر د ټکر له امله رامنځته شوې ده.
د نوموړي په وینا، د سراچې موټر ټول مسافر چې ۹ کسان و، مړه شوي او د ۴۰۴ ډوله مسافر وړونکي موټر ۲ سپرلۍ ټپيان شوې دي.
د عبدالعلي فقیریار په خبره، په مړو شويو کسانو کې ۳ ښځې، يو ماشوم او ۵ سړي شامل دي.
هغه زیاتوي چې روغتیا پالان د پېښې ځای ته رسېدلي او ښايي د ددې پېښې د قربانیانو په شمېر کې زیاتوالی راشي.
د يادولو وړ ده چې ډېر کله داسې پېښې د موټر چلوونکيو د بې احتياطۍ له کبله رامنځته کېږي.