تاند، جمعه، د ثور ۲۶مه: د سیمه ییزو ارګانونو خپلواکې ادارې ویلي چې پنځو ولایتونو ته دوی د وړاندیز او د اشرف غني له لوري د منظوری په اساس نوي والیان وټاکل شول.
دغه ولایتونه، لوګر، زابل، غور، بامیان او دایکندي یاد شوي چې نوي والیان ورته ګومارل شوي دي.
د یادې ادارې له لوري په خپره شوې خبرپاڼه کې راغلي چې د لوګر مخکېنی مرستيال والي تورن جنرال محمد نبي احمدزی د زابل، د اطلاعاتو او کلتور وزارت د ځوانانو معين محمد اجمل شاهپور د لوګر، بريد جنرال نور محمد کوهنورد د غور، د دايکندي مخکېنی والي سيد انور رحمتي د باميان او محمد ضيا همدرد د دايکندي د والي په توګه ټاکل شوي دي.
دا په داسې حال کې دی چې د اشرف غني او عبدالله ترمنځ یو جوړجاړی لا هم ندی شوی خو ولسمشر خپلې ګمارنې بیرته پیل کړې دي.
څو ورځې وړاندې داسې اوازې وې چې ګواکې زر به د یوه جوړجاړي اعلان وکړي، خو اوس داسې اټکل کیږي چې لا هم یوه توافق ته نه دي رسیدلي.