تاند (شنبه د دلوې ۴) ولسمشر په همدې یوه میاشت کې دوه وزیران له دندې لرې کړي، چې دواړو په ولسي جرګه کې د تایید رایې ترلاسه کړې وې.

تازه یې د مالیې وزیر عبدالهادي ارغندیوال له دندې ګوښه کړ.

ښاغلی ارغندیوال د عوایدو په راټولولو کې د ځنډ، په مالیې وزارت کې د غیر قانوني ګمارنو، د څېړلو په اړه له ټاکلي پلاوي سره د ښاغلي ارغندیوال مرسته نه کول او د یاد پلاوي مخنیوی، مدیریتي ضعف، د حکومتولۍ ارزښتونو ته نه ژمنتیا، د اساسي قانون د ۷۷ مادې په پام کې نه نیول او د جمهوري ریاست له احکامو څخه د سرغړونې له کبله له دندې لرې کړل شوی.
د جمهوري ریاست د چارو ادارې د خبر پاڼې له مخې د نوموړي پر ځای خالد پاینده مالیې وزارت ته سرپرست وزیر ټاکل شوی.

د ولسمشر غني د ټاکنیز کمپاین د دورې نیږدې ملګری عبدالهادي ارغندیوال، په داسې حال کې له دندې ګوښه کیږي، چې لاهم د ۱۴۰۰ مالي کال بودیجه نه ده تصویب شوی او مالیې وزارت به د دریم ځل لپاره د بودیجې مسؤده د تصویب لپاره ولسي جرګې ته وړاندې کوي.

باید یاده شي، چې ولسمشر غني د روانې میاشتې په لومړیو کې د روغتیا وزارت وزیر احمد جواد عثماني هم له دندې ګوښه کړ.

که څه هم ګوښه شوو وزیرانو له ولسې جرګې د باور رایه ترلاسه کړې وه، خو په خپلو دندو کې د فساد او ښې کارکردګۍ د نه لرلو له امله د ولسمشر له لوري له دندو ګوښه کړل، چې اوس مهال یاد وزارتونه د سرپرستانو له لوري رهبري کیږي.

په همدې حال کې بیا تازه د اطلاعاتو او کلتور وزارت معئین محمد رسول باوري او د ماليې وزارت ویاند شمروزخان مسجدي هم له خپلو دندو استعفاء کړې ده.