تاند (پنجشنبه د دلوې ۲) د افغانستان د بهرنیو چارو وزیر محمد حنیف اتمر سعودي عربستان ته د خپل سفر پر مهال د رابطه عالم اسلام په نامه بنسټ له رئیس او د اسلامي نړۍ له پېژندل شوي مفکر محمد بن عبدالکریم العیسی سره د سعودي په پلازمېنه ریاض کې کتلي دي.
د بهرینو چارو وزارت نن پنجشنبه په یوه بیان کې ویلي، په دې لیدنه کې دواړو لوریو په افغانستان کې د روانې جګړې په اړه بحث او خبرې وکړې.
د سرچینې د معلوماتو له مخې دواړو خواوو د افغان جګړې او وینې تویېدنې پر پای ته رسېدو ټینګا کړی.
په بیان کې د ښاغلي العیسی له قوله راغلي، په اسلام کې ترهګري نشته او زیاته کړې یې ده چې نباید جنایتکارانه او تروریستي اعمال په اسلام پسې وتړل شي.
نوموړي د خپلو خبرو پر دوام ویلي چې دوی په افغانستان کې د جګړې پایته رسول خپل مسؤلیت ګڼي او ژمنه یې کړې ده چې ډېر ژر به د افغان جګړې پای ته رسولو په موخه د اسلامي نړۍ د عالمانو، مفتیانو او مفکرانو یوه ناسته راوبولي تر څو د افغانستان بحران ته یوه معقوله حل لاره ومومي.
د نوموړي په وینا چې په یاده ناسته کې به طالبانو ته هم د ګډون بلنه ورکړي.
محمد بن عبدالکریم العیسی په داسې مهال د اسلامي نړۍ د عالمانو د ناستې رابللو خبره کړې چې تر دې وړاندې هم ګڼو دیني عالمانو په افغانستان کې روان تاوتریخوالی د اسلامي شرعیت خلاف عمل بللی دی.
د افغانستان په ګډون د نړۍ ګڼ شمېر دیني عالمانو د افغان جګړې په اړه فتواوې صادرې کړي او ویلي یې دي چې په افغانستان کې روانه جګړه کوم دیني مشروعیت نه لري، بلکې واک ته د رسېدو هڅه ده.