تاند – ساينس پوهان په دې توانېدلي دي چې د موږك عمر كابو يو نيم برابر اوږد كړي. دوى د همدې كاميابۍ په اساس اټكل كوي چې دا ممكنه ده چې د انسان عمر د اوس يو نيم برابر يعنې يوسلوپنځۀ ويشت كلونو ته اوږد شي.
د هسپانيا په مركز مادريد كې د سرطان په اړه د څېړنو د ملي مركز ساينس پوهان په موږكانو باندې د تجربې په وخت وتوانېدل چې د موږكانو عمر يو نيم برابر ته وغځوي. د پوهانو په نظر اوس دا امكان لرې نه ښكاري چې د ساينس په بركت د انسان عمر هم يو نيم برابر اوږد شي.
په دې باره كې ډېلي ميل ورځپاڼې د نامتو عالمې ماريا بلاسكو له قوله كښلي دي چې اوس د آب حيات او همېشنۍ ځوانۍ ارزو يوازې يو خوب و خيال نه دى بلكې د موږكانو په اړه دې نوې كاميابې تجربې دا هيله پيدا كړې ده چې د انسانانو عمر هم اوږد شي.
ساينس پوهان د موږكانو په باره كې دې نويو تجربو ته هله ورسېدل چې د عمر په اوږدوالي او د سرطاني ځېلو په مخنيوي كې درې اغېزمن جينونه يې د موږك په بنيادي سيلونو او حجرو كې دوه برابره كړل. د دغو جينونو د دوه برابره كولو نتيجه دا وه چې موږكان د خپل متوسط درې كلن عمر په ځاى څلور نيم كاله عمر وكړي. د يادولو ده چې د دغو موږكانو اولادې هم كابو يو نيم برابر عمر كړى دى.
د بريتانيا يو نامتو ساينس پوه اوپري دي ګري د موږكانو د عمر د زياتوالي په اړه دغه نوى برى د ساينس يو لوى پرمختګ ګڼي او وايي چې دا تجربه ممكن د انسانانو په برخه كې هم كاميابه شي.