تاند ( دوشنبه، د جدي ۲۹) د ملګرو ملتونو سرمنشي انتونیو ګوترېش ویلي چې له دې وروسته ایران په دغه سازمان کې د رایې ورکولو حق نه لري.
ګوترېش زیاتوي چې ايران له دغه حق څخه ځکه محروموي چې ملګروملتو ته يې ۱۶ میلیونه ډالر حق العضویت نه دی ورکړی.
هغه د څو نورو هېوادونو نومونه هم ملګرو ملتونو ته سپارلي او امر یې کړی چې باید د رایې له حق څخه محروم شي.
بل لورته بیا ایران ویلي چې دوی د ملګرو ملتونو اصولو ته ژمن دي.
ایران زیاتوي دا چې پر دوی بندیزونه وضع شوي او مالي سرچینې یې تړل شوې دي نو ځکه د حق العضویت په ورکړه کې ځنډ راغلی دی.
ایران داسې مهال له دې بندیز سره مخ کېږي چې تازه دې هېواد تېره ورځ ویلي وو، د سولې بین الافغاني مذاکراتو د څار تر ټولو ډاډمنه لار د ملګرو ملتونو له لوري د یو استازي ګومارل دي.
په کابل کې د ایران سفیر محمد رضا بهرامي زیاته کړې وه چې د سولې پروسې د بریا او پر دې بهیر د بې طرفه او ډاډمن څار لپاره په کار ده چې ملګري ملتونه د افغان سولې لپاره ځانګړی استازی وګوماري.