تاند ( دوشنبه، د جدي ۲۹) د لغمان ولایت امنیتي چارواکي وایي ملي امنیت ځواکونو د وسله والو طالبانو ۴ مهم غړي نیولي دي.
د لغمان د رسنیو دفتر وایي دا کسان په تېره یوه اونۍ کې نيول شوي دي.
د سرچینې په خبره نیول شویو طالبانو په خپلو جرمنو اعتراف کړی او اوس مهال په ملي امنیت ریاست کې ترې څېړنې روانې دي.
د لغمان د رسنیو دفتر هغه وېډیو هم له رسنیو سره شریکه کړې چې دوی ته يې په کې اعتراف کړی.
د سرچینې د معلوماتو له مخې نیول شویو وسله والو طالبانو د ماینونو ځای پرځای کولو، ترور، تخریبي او نور ګڼ ترهګریز فعالیتونه ترسره کول.
بل لورته وسله والو طالبانو تر اوسه په دې اړه رسنیو ته څه نه دي ویلي.