تاند(دوشنبه، د جدي ۲۹) بهرنیو چارو وزارت وایي د افغان سولې په اړه یې د سیمه ییزې او نړیوالې اجماع د پياوړتیا پر دوام د ګڼو هېوادونو او نړیوالو سازمانونو له استازو سره خبرې کړې دي.
ددغه وزارت له لوري په خپره شوې اعلامیه کې راغلي چې د بهرنیو چارو وزارت سیاسي مرستیال میرویس ناب، د مصالحې عالي شورا رییس ډاکټر عبدالله عبدالله او د افغان مذاکراتي پلاوي مشر معصوم ستانکزي د ګڼو هېوادونو او نړیوالو سازمانونو له استازو سره د ویډیو کنفرانس له لارې د سولې پر مسئله خبرې کړې دي.
میرویس ناب ویلي چې د افغانستان سوله د ټولې سیمې په ګټه ده او په دې تړاو د نړیوالو همکاري اړینه ده.
ګډونوالو هېوادونو او نړیوالو سازمانونو هم له افغان حکومت سره د سولې به برخه کې د پوره همکارۍ ډاډ ورکړی دی.
شاو خوا څلور میاشتې وړاندې په قطر کې د افغان حکومت او طالبانو ترمنځ د سولې بین الافغاني مذاکرات پیل شول چې اوس هم دغه خبرې دوام لري خو کومې نتیجې ته رسیدلې نه دي.
له دې وړاندې یو شمیر رسنیو خبر ورکړی و، چې د افغان سولې پر سر خبرې اترې د امریکا د منتخب ولسمشر جوبایډن د حکومت تر پیلېدو ځنډېدلي دي، خو طالب لوري بیا دغه راپورونه رد کړل او په خبره یې، چې دواړو لوریو د خپل منځي ناستو لپاره وقفه اخیستې وه.