(تاند، یکشنبه، جدي ۲۸) د افغانستان د ملي امنیت شورا سلاکار ډاکټر حمدالله محب نن سهار د یو لوړپوړي حکومتي پلاوي په مشري هلمند ولایت ته په سفر لاړ.
له امنیت شورا څخه په خپره شوې خبرپاڼه کې ویل شوي: “ډاکټر محب به په دغه سفر کې د هلمند، کندهار، زابل، ارزګان، ډایکنډي او نیمروز ولایتونو له والیانو او نظامي مسؤولانو سره وګوري او د دغو ولایتونو د عمومي امنیتي وضعیت ارزونه به وکړي.”
په خبرپانه کې راغلي، چې د ملي امنیت شورا سلاکار به د ۲۱۵ میوند او ۲۰۵ اتل قول اردوګانو د امنیتي راپورونو د ارزونې تر څنګ له امنیتي او دفاعي سرتېریو سره هم وګوري او د هغوی ستونزې او غوښتنې به واوري.
حمدالله محب همدا تیره ورځ د هېواد شمال بلخ او له هغې بیا دوه ورځې وړاندې، ختيځو ولایتونو ته په سفر تللی و، چې په امنیتي برخه کې ځینې تازه ګمارنې هم وکړې.
نوموړي پرون په شاهین قول اردو کې افغان ځواکونو ته په خبرو کې ویلي وو، چې د طالبانو له لوري د اوسني نظام پر وړاندې د دوی جګړه ناروا او باطله ده، ځکه د نړۍ په کچه دیني علماوو یې د رد فتواوې ورکړي دي.
د امنیتي چارو شنونکي، د محب وروستي سفرونه ګټور بولي او په خبره یې، چې په لرې پرتو ولایتونو کې د امنیتي ځواکونو پوښتنه، د چارو ارزونه او ستاینه د دوی د روحیې له پیاوړي کیدو سره مرسته کوي.