تاند ( شنبه، د جدي ۲۷) افغان امنیتي چارواکو د وسله والوطالبانو هغه ادعا رد او بې بنسټه وبلله چې ویلي یې وو د افغان ځواکونو په عملیاتو کې په تېرو دوو اونیو کې ۷۲ تنو ته مرګ ژوبله اوښتې ده.
تېره ورځ طالبانو د یوې اعلامیې په خپرولو سره ویلي چې په تېرو ۲ اونیو کې د دولتي ځواکونو په هوایې او ځمکنیو بریدونو کې ۳۸ ملکیان وژل شوي او ۳۴ تنه نور ټپیان دي.
د طالبانو په اعلامیه کې لیکل شوي چې دا مرګ ژوبله په ۱۹ ولایتونو کې ملکیانو ته اوښتې ده.
سرچینې زیاته کړې چې د دولتي ځواکونو په یادو عملیاتو کې دغه راز دوه جوماتونه ۱۵ د استوګنې کورونه او ۶۰ دوکانونه هم زیانمن شوي دي.
خو بل لورته د ملي امنیت شورا بیا د طالبانو دغه اعلامیه بې بنسټه ادعا بولي.
د ملي امنیت شورا ویاند رحمت الله اندړ وایي د دغه ادعا د ثبوت لپاره هېڅ شواهد نشته.
اندړ زیاتوي چې افغان حکومت تر ډیره د ملکي خلکو خوندیتوب ته جدي پام کوي او د ملکي خلکو خوندیتوب یې په لومړیتوبونو کې دی.
دا په داسې حال کې ده چې په دې وروستیو کې په ټول هېواد کې د افغان حکومت او طالبانو ترمنځ جګړې زور اخيستی او د دواړو لوریو ترمنځ په جګړه کې ملکیانو ته مرګ ژوبله اوړي.
عام افغانان د جګړې له ښکېلو خواوو غواړي چې د دوی خونديتوب ته دې جدي پام وکړي.