تاند(چهارشنبه، د جدې ۱۶) د افغانستان د سولې بل پړاو خبرې په مقدماتي ډول په یوه ورځ ځنډ نن ماښام پیل شوې.
دواړه خواوې وايي چې د نن ماښام غونډه مقدماتي وه او په لړ کې یې پرېکړه وشوه چې د دواړو خواوو له لوري ټاکل شوي ټیمونه دې د اجنډا پر موضوعاتو د شنبې له ورځې بحثونه پیل کړي.
تر دې وړاندې نن د افغانستان د دولت د مرکچي پلاوي یوه غړي تاند ته وویل چې د طالبانو د مرکچي پلاوي ټول غړي دوحې ته نه دي رارسېدلي او له همدې کبله خبرې پیل شوي نه دي.
د افغانستان د دولت د مرکچي پلاوي یوه بل غړي تاند ته وویل چې د دولت د مرکچي پلاوي ټول غړي هم دوحې ته نه دي رسېدلي.
ښايي همدا دلیل وي چې د رسمي خبرو پیل یې د شنبې ورځې ته ځنډولي دي.
ټاکل شوې وه چې د سولې د خبرو دوهم پړاو د جنورۍ په ۵ مه (سې شنبه) پیل شی.
دواړو خواوو په لومړي پړاو کې، چې د سپټمبر په ۱۲ یې پیل کړی و، یوازې د رسمي خبرو پر اجنډا موافقه وکړای شوه.
د اجندا پر سر له موافقې وروسته د دواړو خواوو د پرېکړې پر اساس په خبرو کې وقفه راوړل شوه.