تاند (چهارشنبه د جدي ۱۷) د ننګرهار ځايي چارواکي وايي چې په دغه ولایت کې د هوايي برید پر مهال ۱۵ وسله وال طالبان وژل شوي دي.
د ننګرهار مطبوعاتي دفتر نن چهارشنبه د یوې خبرپاڼې په خپرولو سره ویلي، چې دغه وسله وال نن ماښام د سره رود ولسوالۍ په ککړک سیمه کې هغه مهال په نښه شول چې په یوه پټنځای کې راټول شوي و.
په خبرپاڼه کې راغلي، وسله والو طالبانو غوښتل د امنیتي ځواکونو پر پوستو بریدونه وکړي، خو هوايي ځواک پرې وار ړومبی کړی او وژلي یې دي.
طالبانو تر اوسه په دې هکله څه نه دي ویلي.