تاند(سه شنبه، د جدي ۱۶) د افغانستان د بهرنیو چارو وزارت د پاکستان بلوچستان ایالت کې د کانونو د ۱۱تنو کارکوونکو وژنه په کلکه غندلې چې په کې ۷ کسان افغانان هم دي.
په یاده خبرپاڼه کې راغلي، چې په کویټه کې د افغانستان قونسلګرۍ او په اسلام أباد کې د افغانستان سفارت دنده لري چې د قربانیانو کورنیو ته په هره برخه کې د مرستې زمینه برابره کړي.
دغه راز پرون پاکستاني رسنیو ویلي وه چې تیر سهار د پاکستان بلوچستان ایالت په بولان سیمه کې کویټې ښار ته نږدې ۱۱ تنه د کانونو کارګران ووژل شول.
د پاکستان په بلوچستان ایالت کې ددې ۱۱ کارګرانو د وژنې مسولیت هم داعش ډلې په غاړه اخیستی وه.
بهرنیو چارو وزارت وایي، له دې ۱۱ تنو کارګرانو څخه ۷ تنه يې افغانان وو.
ویل کیږي چې د دې ۱۱ تنو جسدونو په داسې حال کې پیدا شوي چې لاسونه او سترګې يې تړل شوي وو او مرۍ يي پرې شوې وي.