د ارواښاد کاکړ د څلورم تلین بیا خپرېږي
استاد هوتک
څرخ ته گــورم په حیرت د زمـانې
زمــوږ په برخه ئې راکــــړي جنازې
چي امید مـو یوه سـرته وغوړېږي
د مرگي په تېغ ئې غــوڅ کړي رانه پرې
په کلـونو روزل سـوي ستر مغزونه
په یـوه شېبه کي خــاوري سي ایرې
پښـتانه و آرامۍ ته پــیدا نه دي
ســرگــردانه زېږېدلي له ادې
چي نېستۍ ته د سـرو او سړو گورم
آینده سي را ښــکاره تــــوري تیارې
ما به هــــله پر مـرگـونو نه ژړلای
کې ځایناستي پاته سوي وای دوه درې
په ( لاتقنطوا) د زړه ســوده کـومه
کنه ژوند دئ ډېر بېخــونده بې مزې
پر کاکــړو نن بــیا تندر د مرگ پرېووت
” حسن” جزء سو د” تاریخ”، ” موگ” په پسې
ـــــــــــــــــــــــــــــــــــــــ
وروستۍ مصرع تاریخي مادې دي او حل ئې د ابجد په حساب داسي دئ :
حسن = ۱۱۸
تاریخ = ۱۲۱۱
موگ = ۶۶ ( د شعري او حسابي اړتیا له مخي همداسي ولیکل سو)
ـــــــــــــــــــــــــــــــــ
ټول = ۱۳۹۵
پوهاند حسن کاکړ د ۱۳۹۵ش کال دجدي پر ۱۶مه د پنجشنبې په ورځ = ۵ مه د جنورۍ ۲۰۱۷ع په کلیفورنیا کي د ۸۸ کالو په عمر مړ سو. خدای دې وبخښي.
آشاوا ــ کاناډا
۶ مه د جنورۍ ۲۰۱۷ع
د سهار اته بجې