تاند ( یک شنبه، د جدي ۱۴) د ملي دفاع وزارت وایي چې د هلمند سنګین ولسوالۍ لپاره د طالبانو نومول شوی ولسوال ملا شفیع الله وژل شوی دی.
یاد وزارت په یوه خبرپاڼه کې وایي چې ملا شفیع الله د افغان ځواکونو د هوايي برید په پایله کې له پنځو نورو طالبانو سره وژل شوی دی.
سرچینه وایي چې دغه راز په دې هوایي برید کې د ملا ظاهر په نوم د دوی یو ډلمشر او درې نور طالبان ټپيان شوي دي.
بل لورته ختیځ کې د ملي امنیت ځانګړي ځواکونه وايي چې تېره شپه یې د غني خېلو ولسوالۍ اړوند، ۲۶ ویالې سیمه کې د یو لړ ځانګړو شپنیو عملیاتو پر مهال د داعش ډلې د رهبرۍ غړی وژلی دی.
سرچینه زیاتوي چې دغه راز په دې عملیاتو کې اوه تنه نور داعش ډلې سره د اړیکو په تور نیول شوي دي.
داعش او طالب وسله والو تر اوسه په دې اړه رسنیو ته څه نه دي ویلي.