تاند ( یک شنبه، د جدي ۱۴) د کابل امنیتي چارواکي وایي چې، تېره شپه د برکي څلورلارې ته نږدې په یوه نانوايي کې له ګازو ډکې ډبې چاودلې دي.
د کابل امنیه قومندانۍ مسوولان وایي چې، په دې چاودنه کې ۵ تنه مړه شوي دي.
مړو شویو کسانو ټولو په یاد نانوايي کې کار کاوه چې ناڅاپه پرې له ګازو ډکه ډبه چاودلې ده.
عیني شاهدان وایي د ډبې له چاودنې وروسته په یاده ساحه کې سخت اورهم لګېدلی وو.
دوی وايي چې په پېښه کې لس کسه نور ټپیان شوي هم دي.
د عیني شاهدانو په خبره په ټپیانو کې هغه کسان شامل دي چې د پاکستان د وېزې اخیستلو لپاره په سیمه کې راټول شوي وو.
رسنیو د عیني شاهدانو له قوله ویلي چې د نانوایۍ پنځه کارکوونکي د ګازو د چاودنې له امله لومړی سخت ټپي شوي وو خو وروسته یې په روغتون کې د ژورو ټپونو له امله سا ورکړې ده.
د ژمي په موسم کې وخت ناوخت په هېواد کې د سون توکو او ګازو د خراب کیفیت له امله دغه ډول پېښې رامنځ ته کېږي.
د یادونې ده چې له دې وړاندې په ختیځ ننګرهار کې هم په یوه کور کې د ګازډبې د چاودنې له امله ۵ تنو خپل ژوند بايللی وو.
دا پېښه د تېرې سې شنبې په ورځ ماښام مهال د شینوارو ولسوالۍ اړوند پینځه ویشتمې ویالې سیمه کې شوې وه چې په کې د یوې کورنۍ د ۲ ماشومانو په ګډون ۵ کسان مړه شوي وواو ۳ نور ژوبل وو.