تاند(شنبه، د جدي ۱۳) د کورنیو چارو وزارت وايي، پولیسو په تیرو ۴۸ ساعتونو کې د کابل ولایت په اړوندو سیمو کې ۲۳ تنه د جنايي جرمونو په تور نیولي.
ددې وزارت له لوري نن شنبه په خپره شوې خبرپاڼه کې راغلي، پولیسو د تیرو ۴۸ ساعتونو په لړ کې د کابل ولایت په اړوندو سیمو کې د څو جلا عملیاتو د ترسره کولو پر مهال ۲۳ تنه د جنايي جرمونو په تړاو نیولي دي.
دا په داسې حال کې ده چې کابو درې ورځې مخکې د هیواد په درې ولایاتو دایکندي، لغمان او فراه کې ۱۷ تنه د جنايي جرمونو په تور ونیول شول.
دغه راز څو ورځې وړاندې هم په کابل ښار کې د ملي پولیسو لخوا ډیری کسان د جنايي جرمونو په تور نیول شوي و.
د یادونې وړ ده چې په دې وروستیو کې په مسؤلینو نیوکه کیږي چې د عامو خلکو د امنیت په ټینګښت کې پاتې راغلي او ډېر کله ملکي وګړي له له امنیتي ننګونو سره مخامخ کېږي.