تاند (پنج شنبه، د جدي ۱۱) پاکستان یوځل بیا د پاکستاني وېزو د وېش برخه کې د فساد د ختمولو ژمنه کوي.
د یاد هېواد د کورنیو چارو وزیر شېخ رشید احمد وایي د راتلونکي کال له جنورۍ به افغانانو ته د وېزې د ورکړې سیستم انلاین شي.
نوموړي زیاتوي چې دوی ته داسې معلومات رسېدلي چې دمګړی له افغان او چینایي وګړو د پاکستاني وېزې د ورکړې برخه کې رشوت اخیستل کېږي.
رشيداحمد زیاتوي چې دوی هڅه کوي په دې بهیرکې د فساد مخه ونيسي.
د نوموړي په وینا د راتلونکي میلادي کال له پيله به د ویزو اخیستلو ټول سیستم انلاین شي او دفساد مخه به هم ونیول شي.
د پاکستان د کورنیو چارو وزیر د ویزو د ورکړې په برخه کې د لا اسانتیاوو برابرولو ډاډ هم ورکړی دی.
دا په داسې حال کې ده چې له دې وړاندې په ځلونوپه دې برخه کې د فساد غږونه پورته شوي او چارواکو د فساد د مخنيوي ژمنې کړي خو تر اوسه یې ژمنې نه دي عملي کړي.
وبه لیدل شي چې پاکستان څومره په خپلې ژمنې عمل کولای شي.