تاند (چهارشنبه د جدي ۱۰) د ننګرهار سیمه ییز چارواکي وايي چې په جلال اباد ښار کې د داعش ډلې د مالي مسؤل په ګډون درې نور شکمن کسان نیول شوي.
د ننګرهار مطبوعاتي دفتر نن چهارشنبه د یوې خبرپاڼې په خپرولو سره ویلي، د جلال اباد ښار څلورمې ناحیې اړوند بیزاکمالاتي سیمه کې د ملي امنيت ځانګړو ځواکونو شپني عملیات ترسره کړي، چې په پایله کې یې د داعش ډلې مالي مسؤل او درې نور شکمن کسان نیول شوي دي.
خبرپاڼه زیاتوي، د داعش ډلې نیول شوی کس چې نابينا دی، په تېر کې یې د افغان دولت پر خلاف تبلیغات او داعش ډلې ته یې د جلب او جذب لپاره تقریرونه هم کړي دي.
د یادونې وړ ده چې دا په روانه اونۍ کې د داعش ډلې درېیم غړی دی چې د ملي امنیت ځواکونو له خوا په جلال آباد ښار کې نیول کېږي.
د یو بل خبر له مخې، د ملي امنیت منسوبینو جلال اباد ښار او تورخم ښارګوټي کې د وسله والو طالبانو دوه غړي نيولي دي.
د ولایتي ادارې د معلوماتو له مخې په نيول شويو کسانو کې يو تن چې اصلي د ننګرهار حصارک ولسوالۍ اوسېدونکی دی، خو اوسمهال په پاکستان کې ژوند کوي او يو تن بل د کونړ ولايت اوسېدونکی دی، پر خپلو جرمونو اعتراف کړی دى.
داعش او طالبانو تر اوسه په دې هکله کوم څه نه دي ويلي.