حشمت ناصري
ښار جوړولو او ځمکو وزارت په ښاري سکټور کې یو مخکښ وزارت دی چې عمدتاً د ښاري، ځمکوالۍ، مسکن او ساختماني چارو تنظیم تر څنګ له دولتي املاکو څخه د ګټورې استفادې په موخه خپلې کړنې تر سره کوي. د یاد وزارت مشرتابه تل هڅه کوي چې د ښاري پلانونو د ترتیب او منظورۍ له لارې د ښارونو پراختیا د مسیر ټاکلو سربېره د حکومت پراختیايي او ټولګټو پروژو پلي کېدو ته چې پایله یې اقتصادي وده، کارمونده او ټولنیزه هوساینه ده، لار هواره کړي.
همدې ارزښت ته په کتو، د ښار جوړولو او ځمکو وزارت مشرتابه له لوري په تېرو شپږو میاشتو کې ۲۵ ښاري پراختیا پلانونه منظور شوي چې په دې پلانونو کې ۷ تفصیلي، ۱۱ سټراټیژیک، ۲ منطقوي او ۵ د بهسازۍ پلانونه شامل دي.
په تفصیلي پلانونو کې د کابل ولایت شکردرې ولسوالۍ د غالۍ اوبدونکو ښارګوټي تفصیلي پلان، د ننګرهار ولایت رودات ولسوالۍ او بحراباد د ښوونکو ښارګوټو تفصیلي پلانونه، د لوګر ولایت د پل علم ښوونکو ښارګوټي تفصیلي پلان، په فراه ولایت کې د زرو کورنیو د استطاعت وړ کورونو ښارګوټي تفصیلي پلان او د غور ولایت د فیروز کوه ښار د لومړي او دویم فاز تفصیلي پلانونه شامل دي چې په د دې پلانونو په پلي کېدو سره به په یادو ولایتونو کې ۷ ښارګوټي جوړ او شاوخوا ۲۰ زره کورنیو ته په مستقیمه توګه د استوګنې زمینه برابره شي.
همداراز، په سټراټیژیک پلانونه کې د جوزجان مرکز شبرغان ښار سټراټیژیک پلان، د بامیان ولایت د ورس، سیغان او یکه ولنګ ولسوالیو سټراټیژیک پلانونه، د کاپیسا ولایت د حصه اول کوهستان ولسوالۍ سټراټیژیک پلان، د خوست ولایت د نادرشاه کوټ او ګربز ولسوالیو سټراټیژیک پلانونه، د بغلان ولایت د ده صلاح، دوشي او اندراب ولسوالیو سټراټیژيک پلانونه او د تخار ولایت د تالقان ښار سټراټیژيک پلان شامل دي.
سربېره پر دې، د ارزګان او نیمروز ولایتونو لپاره دوه منطقوي پلانونه هم د ښار جوړولو او ځمکو وزارت مشرتابه له لوري منظور شوي دي چې دا سټراټیژيک او منطقوي پلانونه د اوږد مهاله لیدلوري په توګه، د یاد ولایتونو د منظم انکشاف، ټولګټو او انکشافي پروژو د پلي کېدو او د حکومت پراختیایي او اقتصادي پالیسیو او پلان جوړونې د تطبیق لپاره له دولتي ځمکو څخه ګټورې او معقولې استفادې ته لار هواروي.
په همدې ترتیب، په تېرو شپږو میاشتو کې، د فاریاب، سرپل، سمنګان او پروان ولایتونو لپاره د بهسازۍ پنځه پلانونه منظور شوي دي.
ښار جوړولو او ځمکو وزارت د غیر رسمي سیمو د ثبت سربېره، له ښاري سکټور ادارو سره په همغږۍ د بهسازۍ پلانونو د ترتیب او منظورۍ او همدارنګه د احیاء مجدد پروژو د پلي کېدو له لارې هڅه کوي چې غیر رسمي سیمې په ښو استوګنیزو سیمو بدلې کړي، څو هېوادوالو ته غوره ښاري خدمتونو وړاندې او د رسمي او غیر رسيمي سیمو تر منځ توپیر لهمنځه لاړ شي.
ښار جوړولو او ځمکو وزارت مشرتابه د دولتي ځمکو د تنظیم او مدیریت او ښاري پراختیا پلانونو د ترتیب او منظورۍ له لارې هڅه کوي چې له دولتي ځمکو څخه د ګټورې او معقولې استفادې او د حکومت پراختیايي او ټولګټو پروژو پلي کېدو ته لار هواره کړي.