تاند(شنبه، د قوس ۲۹) د هرات ولایت امنیه قوماندانې وايي، ددې ولایت په انجیل ولسوالۍ کې درې ملکیان د یوې ښځې، یو سړی او یو څلور کلن ماشوم په شمول وژل شوي او وروسته یې جسدونه سوځول شوي دي.
د هرات د والي ویاند جیلاني فرهاد رسنیو ته وویل، دغه درې کسان چې د دغه ولایت د انجیل ولسوالۍ په کهرستان شهرک کې موندل شوي دي تراوسه یې د مړینې لامل نه دی معلوم او په وینا یې دغه کسان تر وژل کېدو وروسته سوځول شوي دي.
نوموړي زیاته کړه، د یادو کسانو د مړینې علت تراوسه نه دی معلوم او په وینا یې پولیس د پېښې د څرنګولي معلومولو او د عاملینو د نیولو په لټه کې دي.
دا په داسې حال کې دی چې په دې وروستیو کې د پلازمېنې کابل په شمول په ټول هېواد کې مرموزې وژنې زیاتې شوې دي او هره ورځ د نامعلومو کسانو له لورې مختلف ډول قتلونه ترسره کېږي.