تاند(پنجشنبه، د قوس ۲۷) د امریکا لوی درستیز مایک میلي په قطر کې د طالبانو له مرکچیانو او په کابل کې د افغانستان له ولسمشر سره کتلي دي.
د میلر د کتنو په اړه، چې مخکې یې کړي، د ده دفتر نن (پنجشنبه) خبر ورکړ.
امریکايي رسنیو ویلي چې مارک میلي په قطر کې د طالبانو له مرکچیانو سره د افغانستان د سولې په پروسه کې د پرمختګ پر امکاناتو خبرې کړي.
د امریکا د لوی درستیز دفتر ویلي چې لوی درستیز د تاوتریخوالي د فوري کمېدو او د خبرو له لارې د پرمختګ د چټکتیا غوښتنه وکړه او دا یې د سیمې د ثبات او د امریکا د ملي ګټو لپاره مهمه وبلله.
جنرال میلر د اسوشیتیدپریس خبري اژانس خبریال ته، چې له ده سره په سفر کې ملګری و، ویلي«د خبرو تر ټولو مهمه برخه چې ما له دواړو خواوو طالبانو او د افغانستان له حکومت سره لرلې هغه د فوري اوربند اړتیا وه. نورې ټولې چارې له دې (اوربند) سره تړاو لري.»
اسوشیتید پریس خبري اژانس وايي چې له طالبانو سره د جنرال میلر د سې شنبې د ورځې نااعلان شوې کتنه د ده دوهمه کتنه وه. تر دې وړاندې یې په جون میاشت کې له طالبانو سره لیدلي وو خو تراوسه یې خبر نه و خپور شوی.