تاند(جمعه/اکتوبر۲۹) ۱۵۷ کاله پخوا د ۱۸۶۳ ع کال د اکتوبرپه ۲۹ مه د سره صلیب کمېټه یا ټولنه د «هتري دونان» په برکت د جینوا په نړیوال کنفرانس کې جوړه شوه. هنري دونان د جینوا ښار اوسېدونکی بشر دوست انسان وو.
هنري دونان، چې یو سوداګر و. د ۱۸۵۹ ع کال په دوبي کې د ایټالیا د شمال په سولفرینو کې د اتریش او د ایټالیا او فرانسې د ګډو ځواکونو د خونړۍ جګړې شاهد و.
ده په دې جګړې کې ولیدل چې په زرګونو ټپیان ،بې له دې چې مرسته ورسره وشي، ساه ورکوله، حال دا چې که طبي مرسته ورسېدلې وای ، اکثره به ژوندي پاته شوي و.
په ۱۸۶۲ ع کال ده په خپل مشهور اثر«د سولفرینو یوه خاطره»چاپ کړ.په دې کتاب کې ده د دغه جنګ وحشتناکې صحنې د قلم په ژبه بیان کړې. ده همداراز وړاندیز وکړچې د جګړې په وخت دې د ټپیانو د درملنې لپاره د نړۍ د ټولو هیوادونو یوه مرستندویه ټولنه جوړه شي.
دونان همداراز د یوه نړیوال تړون وړاندیز هم وکړ چې په جګړې کې ښکېلې خواوې به مرستندویو موسسو او ټپیانو ته څه نه وايي.
د جینوا په کنفرانس کې، چې د ۱۸۶۳ ع کال د اکتوبرله ۲۶ څخه تر ۲۹ پوري د نړۍ د ۱۶ هیوادونو د۳۴ استازو په ګډون جوړ شو،برخوالو د غونډې په وروستۍ ورځ (د اکتوبر۲۹) د ټپي پوځیانو د درملنې او پاملرنې لپاره د یوې نړیوالې مرستندویې ټولنې له جوړېدو سره موافقه وکړه.
د دې ټولنې لپاره د سویس د بیرغ برعکس پر سپین بیرغ د صلیب سره نښه غوره شوه.
د سره صلیب نړیوالې کمېټې په دوو نړیوالو جګړو(لومړۍ او دوهمه) کې له ټپیانو، د اسیرو عسکرو د نومونو له ثبت، بندیانو، کډوالو او قربانیانو سره د مرستې په برخه کې د پام وړ مرستې وکړې.
د افغانستان په روانه جګړه کې هم دا موسسه ډېر مهم رول لوبوي. د اسیرو طالبانو له کورنیو سره تماس نیسي او د هغوی خپلوانو ته د خپلو عزیزانو په باب مالومات ورکوي.