تاند (دوشنبه د جدي ۱) د پروان د لویې لارې د امنیتي قطعې قومندان او څلور پولیس د دغه ولایت په مرکز کې د ماین په چاودنه کې وژل شوي دي.
ځايي چارواکي وايي چې دا پېښه تېره شپه شاوخوا ۱۰ بجې د دغه ولایت د مرکز چاریکار ښار اړوند په عبدي بای سیمه کې رامنځته شوې ده.
د پروان د امنیه قوماندانۍ د جنايي پېښو سره د مبارزې مدیر محمد صادق هاشمي وايي، په دې چاودنه کې د پروان د لویې لارې د امنیتي قطعې د قوماندان ولي جان علي زاده په ګډون پینځه سرتېري وژل شوي دي.
تر اوسه کوم چا یا ډلې ددې پیښې مسؤلیت نه دی منلی.