تاند(سه شنبه، د قوس ۲۵) ولسمشرغني تېره ورځ د امریکا د کانګرس له رئیسې او د دغه هېواد د مجلس استازو له یو شمېر غړو سره پر ویډیویي کنفرانس خبرې کړې دي.
له ولسمشرۍ ماڼۍ په خپره شوې خبرپاڼه کې راغلي، ولسمشرغني تېر ماښام د امریکا د کانګرس رئیسې نانسي پلوسي سره پر افغان سوله او د امریکا او افغانستان پر اړیکو خبرې کړې دي.
خبرپاڼه لیکي، په دغه ویډیو کنفرانس کې د هیواد لومړۍ مېرمن، د ولسمشر لومړي مرستیال امرالله صالح، د بهرنیو چارو وزیر محمدحنیف اتمر، د ملي امنیت سلاکار ډاکټر حمدالله محب او د چارو ادارې لوی رئیس ډاکټر فضل محمود فضلي حضور درلود او په امریکا متحدو ایالتونو کې د افغانستان سفیره مېرمن رویا رحماني هم د ویډیو کنفرانس له لارې وصل وه.
په دغه کنفرانس کې دواړو لوریو له افغانستان سره د امریکا متحدو ایالتونو د دوامدار تعهد، سولې پروسې او د هغو د راتلونکو پړاوونو، ښځو حقونو او اوربند پر عاجلې اړتیا د بحث او خبرو پر مهال د تاوتریخوالي د زیاتوالي په اړه خپلې اندېښنې هم څرګندې کړې.
دا په داسې حال کې ده چې په قطر کې د افغان حکومت او طالبانو ترمنځ بین الافغاني مذاکرات د شل ورځو لپاره درېدلي او پر اجنډا له خپلو مشرانو شره پر سلا مشورو بوخت دي.
شاو خوا دوه نیمې میاشتې وړاندې په قطر کې د سولې بین الافغاني مذاکرات پیل شول چې پرته له کومې نتیجې د شلو ورځو لپاره دغه مذاکرات رخصت شول.