راپور: هاشمي
د ادب کور دویمه غونډه (پښتو شعر کې خودشناسي) ته ځانګړې شوې وه. غونډه د قران کریم په مبارکو ایتونو د ننګرهار پوهنتون، پښتو ژبې او ادب څانګې د ماسټرۍ محصل لخوا وشو. ورپسې د سید اصغر هاشمي لخوا بحث د لوی هندوستان علامه اقبال په دې بیت پیل شو: «خودی کو کر بلند اتنا که هر تقدیر سی پهلی ـ خدا بندی سی خود پوچهی بتا تیرا رضا کیا هی»
د بحث لوی عنوانونه دا وو: خودشناسي څه ته وايي؟، په اسلام کې خودشناسي، په ارواپوهنه کې خودشناسي، امام غزالي او خودشناسي، د اسلام او ارواپوهنې د خودشناسي توپیرونه، پښتو ژبه کې د اسلام او ارواپوهنې له اړخه د خودشناسۍ مغالطه، خودشناسي او اسلام، خدای پېژندنه ځان پېژندنه، تصوف او خودشناسي او نور…
په بحث کې د اسلام او نورو ادیانو په اړه په خودشناسۍ بحثونه وشو او همدارنګه د پښتو ژبې هغه شعرونه چې د اسلام له اړخه د خودشناسۍ په اړه وو، یادونه وشوه او د ارواپوهنې په اړه د هغو شعرونو یادونه وشوه چې په معنوي ډول د خودي په اړه وو.
په پای کې له پوښتنو مخکې د ننګرهار پوهنتون استاد پوهنمل ډاکتر طارق ذاکر په موضوع ډېرې نورې نوې خبرې اضافه کړې، همدارنګه د پیداګوژي ماسټر او د ښوونې او روزنې پوهنځي د ارواپوهنې استاد راز محمد فیضي خپل نظریات شریک کړل، له دې وروسته پوهنمل شفیق الله رحماني هم د موضوع په باب نظر ورکړ، د هندي ادبیاتو استاد پوهنمل ډاکتر الکوزي صاحب هم د کار خبرې وکړې، د پښتو ادب د ماسټرۍ او لیسانس دورې محصلانو د موضوع اړوند پوښتنې وکړې، چې د سید اصغر هاشمي او ناستو استادانو لخوا ورته ځوابونه ورکړل شو، په پای کې موضوع د پوهنیار راز محمد فیضي لخوا په دعا پای ته ورسید او د راتلونکي بحث لپاره ډاکتر صاحب طارق ته د تصوف اوعرفان په توپير او تړاو د بحث موضوع ورکړل شوه.