تاند- د هسپانیا د بارسلونا په ژوبڼ کې د څلورو زمریانو د کورونا ټیست نتیجه مثبته وه.
د نړیوالو رسنیو د راپور له مخې، درې زمرۍ او یو زمری وروسته له دې معاینه شول چې د کورونا نښې پکې ولیدل شوې.
د ژوبڼ د دوو کارکوونکو د کورونا وایرس هم تایید شوی دی.
اوس څېړنې روانې دي چې څرګنده شي دا زمریان څنګه او ولې په کورونا وایرس اخته شوي دي خو باور کېږي چې زمریانو ممکن د ژوبڼ له ساتونکو څخه کورونا وایرس اخیستی وي.
د ژوبڼ له لوري له یوه خپور شوي بیان سره سم، په کورونا وایرس اخته شوي زمریان په تنفس کې ستونزه لري او څه نا څه ټوخیږي او پرنجېږي.
دوی ته د عفونت ضد درمل ورکول کېږي او تر پوره څارنې لاندې دي.