تاند (دوشنبه د قوس ۱۷) د افغانستان حکومت وايي چې طالبان باید د اوربند په اړه د افغان ولس، حکومت او نړیوالې ټولنې غوښتنې ومني او روان تاوتریخوالی پای ته ورسوي.

دغه څرګندونې د ولسمشر ویاند صدیق صدیقي نن په کابل کې یوې خبري غونډې ته کړي او ویلي یې دي چې د طالبانو لخوا د نورو بندیانو د خوشې کولو غوښتنه له وخت مخکې ده.

د ښاغلي صدیقي په خبره دوی باید په دوحه کې د خبرو د اجنډا پایلو ته په تمه شي تر څو یاد مذاکرات یوې پایلې ته ورسېږي.

نوموړي دغه څرګندونې وروسته تر دې کړي چې تېره ورځ په کابل کې د امریکا د سفارت شارژدافېر روز ویلسن خبریالانو سره په خبرو کې وویل، طالبان تمه لري چې د امریکا او طالبانو د موافقې پر اساس زرګونه نور طالب بندیان روانه میاشت خوشي شي.

ویلسن زیاته کړه: «د امریکا او طالبانو د موافقې په یوه ځانګړي بند کې د ۷ زره نورو طالب بندیانو یادونه شوې چې د دسمبر تر نیمايي پورې به خوشي کېږي.»

https://taand.net/%d8%af-%d8%a7%d9%85%d8%b1%db%8c%da%a9%d8%a7-%d8%b4%d8%a7%d8%b1%da%98%d8%af%d8%a7%d9%81%db%90%d8%b1-%d9%88%d8%a7%d9%8a%d9%8a%d8%8c-%d8%b7%d8%a7%d9%84%d8%a8%d8%a7%d9%86-%d8%af-%d9%85%d9%88%d8%a7%d9%81/

په ورته مهال د ولسمشر ویاند د هغو راپورونو په اړه چې له ۹۱ کوډ څخه یو شمېر حکومتي کارمندانو پیسې تر لاسه کړي وویل، ولسمشر واک لري چې د اصولو، قانون او اړتیاوو پر بنسټ له ۹۱ کوډ څخه پیسې وباسي او مصرف یې کړي.

خو زیاتوي چې ولسمشرۍ ماڼۍ او اړوند بنسټونه نه شي کولی چې په غیر قانوني توګه او یا د خپل شخصي لګښت لپاره له ۹۱ کوډ پیسې تر لاسه کړي.

تر دې وړاندې داسې راپورونه خپاره شوي و چې د ملي روغې جوړې عالي شورا د مشر عبدالله عبدالله په ګډون ګڼ شمېر لوړ پوړیو حکومتي چارواکو له ۹۱ کوډ څخه په سلګونه میلیونه افغانۍ د شخصي لګښت لپاره ایستلي او حیف و میل شوي دي.