تاند (دوشنبه د قوس ۱۷) د سالنګونو د ساتنې او مراقبت ریاست وايي، د سالنګ لویه لاره د سختو واورو او بادونو له امله د ترافیکو پر مخ تړل شوې ده.
د مسؤلینو په خبره د تېرې شپې ۱۱ بجو راهیسې سختې واورې پیل شوې، چې ورسره سم یاده لاره د بار وړونکو موټرو پر مخ وتړل شوه.
ددې ادارې د خبرپاڼې له مخې، کېدای شي واوره ورېدنه تر راتلونکو ۴۸ ساعتونو پورې دوام وکړي، نو ځکه موټر چلوونکو ته سپارښتنه کوي، چې چینونه او ځنځیرونه وتړي.
تر اوسه په شمالي سالنګ کې ۱۶ ساتني متره او په جنوبي سالنګ کې ۱۵ سانتې متره واوره ورېدلې ده.
تېره ورځ د هوا پېژندنې ملي ادارې په کابل، پروان، میدان وردک، بامیان، غزني، پکتیا، ارزګان، زابل، دایکندي، کندهار، هلمند، فراه، هرات، بادغیس، فاریاب، بلخ، سرپل، غور، بدخشان، تخار او سالنګونو کې د سخت اورښت او سېلابونو راوتلو خبرداری ورکړی و.