تاند ( دوشنبه، د قوس ۱۷) ولسي جرګې د نننۍ غونډې په امتیازي ساعت کې د امريکا پر وروستي درېڅ خبرې کړې دي.
دوی د خبرو پر مهال ویلي چې افغان حکومت د بین الافغاني مذاکراتو تر پیل وړاندې د طالبانو ۵۰۰۰ بندیان خوشي کړي چې د هېواد پر وضعیت او د اوربند پر رامنځ ته کولو يې هېڅ مثبت اغېز نه دی کړی
ولسي جرګې په دې ناسته کې اندېښنه ښودلې او ويلي یې دي چې له دلایلو پرته د طالبانو د زندانیانو خوشي کول به د وضعیت د لا ترینګلتیا او کړکېچ لامل وګرځي.
دوی د راس ویلسن وروستۍ څرګندونې د جدي اندېښنې وړ بللې او زیاته کړې يې ده چې دوی له اوربند او سولې پرته د نورو طالب بندیانو له خوشي کولو سره مخالفت کوي.
ولسي جرګه دا اندېښنه داسې مهال ښيي چې تېره ورځ په کابل کې د امریکا د سفارت شارژدافیر ویلي چې، وسله وال طالبان په راتلونکو څو ورځوکې د خپلو ۷ زرو بندیانو د خوشې کولو غوښتنه کوي.
وېلسن ټينګار کړی و چې دا د دوحې هوکړې برخه ده او هوکړه باید عملي کړل شي.
بل لورته تراوسه افغان حکومت په دې اړه غبرګون نه دی ښودلی.
عام خلک هم د دې پرېکړې مخالفت کوي او وایي له دې وړاندې خوشې شویو بندیانو هېڅ ګټه نه ده لرلې او حکومت باید دا پرېکړه هېڅکله ونه مني.