تاند(جمعه، د قوس ۱۵) د امریکا منتخب ولسمشر جو بایډن د ایران پر وړاندې د ډونالډ ټرمپ پر سیاستونو په نیوکې سره ویلي نه پوهېږي چې د محسن فخريزاده وژنه به د تهران او واشنګټن ترمنځ پر اختلافاتو څه اغېز ولري.
بایډن ویلي د ایران او امریکا ترمنځ به د مسلو حل ستونزمن وي.
بایډن په یوه مرکه کې، د ټرمپ پر بهرني سیاست چې ایران سره چلن هم پکې شامل دی نیوکه کړې ده.
بایډن تر دې وړاندې ویلي وو که ایران د اټومي هوکړې د محدودیتونو پلي کېدو ته راوګرځي نو دی به هم امریکا بېرته دغه تړون ته وګرځوي.
خو د ایران حکومت وايي د امریکا شرطونه نه مني.
تازه د ایران پارلمان حکومت ته پر دغه هېواد د لګېدلو بندیزونو د لغوه کېدو لپاره دوه میاشتې وخت ټاکلی دی.
بایډن د محسن فخريزاده د وژلو په اړه ویلي، سخته ده چې ودې ویل شي، دا موضوع به د امریکا او ایران ترمنځ پر اختلافاتو څومره اغېز ولري.