تاند (جمعه د قوس ۱۴) د افغانستان د کریکټ ملي لوبډلې لوبغاړی مجیب الرحمن چې اوس مهال د استرالیا بیګ باش لوبو کې د ګډون لپاره یاد هیواد ته تللی، په کورونا اخته شوی دی.
مجيب الرحمان څو ورځې وړاندې د محمد نبي، ظاهر خان او نور احمد لکڼوال سره يو ځاى له افغانستان څخه اسټراليا ته لاړ.
د استرالیان برېسبېن هېټ لوبډلې ددغه افغان لوبغاړي د کورونا د ټېسټ په اړه معلومات ورکړي او ویلي یې دي چې نوموړى اوسمهال کوينلېنډ ښار کې په یوه هوټل کې د ۱۴ ورځو لپاره کرنتین شوی دی.
برېسبېن هېټ لوبډله وايي، مجیب الرحمن د کوينلېنډ د روغتيايي مسؤلينو تر څارنې لاندې دى او تر بشپړې روغتيا وروسته به په لوبو کې ګډون وکړي.
د بیګ باش لیګ مشر، الیسټر دوسن هم ویلي دوی ته د لوبغاړو روغتیا لومړیتوب لري او په دې برخه کې به مجیب او نورو لوبغاړو سره مرسته کوي.
مجيب الرحمان ورو توپ اچونه کوي، چې د بيګ باش راتلونکو سياليو کې د برېسبین هېټ لوبډلې لپاره لوبېږي.
بيګ باش سيالۍ سږکال د ډسمبر په ١٠مه پيلېږي، چې د مجيب الرحمان پرته په پکې راشد خان، محمد نبي، ظاهر خان او نور احمد لکڼوال هم لوبې تر سره کوي.