تاند(شنبه، د قوس۱۵) د دې لپاره چې سپوږمۍ او مریخ ته تګ اسانه شي د ناسا په سپارښتنه بوینګ کمپنۍ د نړۍ تر ټولو غښتلي توغندي جوړوي.
د بوینګ له لوري نوي جوړېدونکي راکټونه یا توغندي ایس ایل ایس نومېږي او د امریکا د ازادۍ د مجسمې هومره به لوړوالی لري.
د دغه توغندي د حرکت قوت به څه باندې ۹ ملیون پونډه وي او نژدې ۳۸ ټنه راز راز وسایل او سامانونه به سپوږمۍ ته وړلی شي.
د بوینګ کمپنۍ د عملیاتي چارو د رييس مټ ډاکن په وینا له ایس ایل ایس توغندي څخه د لمریز نظام نورو سیارو ته د اوږدو سفرونو لپاره کار اخیستل کېدای شي او ستورمزلي په هغو کې د ډېر وخت لپاره کار کولی او اوسېدلی شي.
دا توغندي، چې د ناسا یا د امریکا د فضايي تحقیقاتي مرکز تر څارنې لاندې جوړېږي، ۴ آر ایس ۲۵ انجنونه لري او تمه ده چې تر ۲۰۲۱ پورې بشپړ شي.
خو لا هم د دغو توغندو د جوړېدو دقیق وخت نه دی څرګند.